Í ársbyrjun 2012 tók KPMG saman upplýsingar um þau fyrirtæki og lífeyrissjóði sem falla undir löggjöfina og aftur 1. september þegar ár er til stefnu. Samanburðurinn leiðir í ljós að fá fyrirtæki og lífeyrissjóðir nýttu aðalfundina í ár til að fjölga konum.
Í könnun KPMG meðal íslenskra stjórnarmanna sem framkvæmd var sumarið 2011 voru vísbendingar um að fjöldi kvenkyns stjórnarmanna væri að aukast töluvert samhliða nýliðun í stjórnum en sú aukning virðist ekki duga til að auka heildarhlutfall kvenna í stjórnum.
Það er því ljóst að töluverðar breytingar munu þurfa að eiga sér stað í stjórnum þessara fyrirtækja og lífeyrissjóða þegar aðeins einn aðalfundur er til stefnu þar til lögin taka gildi.
Heildarhlutfall kvenna í stjórnum lífeyrissjóða er núna 33,3%. Við fyrstu sýn virðist það hlutfall vera hátt en vert er að benda á að í hverjum lífeyrissjóði þarf hlutfall hvors kyns að vera að lágmarki 40% þegar stjórnarmenn eru fjórir eða fleiri og ef stjórnarmenn eru þrír eða færri þarf hvort kyn að eiga fulltrúa í stjórn. Fjöldi stjórnarmanna er slétt tala hjá 14 af 31 lífeyrissjóðum (t.d. 6 eða 8 stjórnarmenn) sem leiðir til þess að hlutfall hvors kyns þarf að vera 50% í þeim sjóðum (má ekki fara undir 40%). Það leiðir til þess að þegar allir lífeyrissjóðir eru með stjórnir í samræmi við löggjöfina verður heildarhlutfall hvors kyns í stjórnum lífeyrissjóða a.m.k. 45,3%.